Ua nueit de Nadau a Lectora

Nadau.webp

Guilhem

Ua nueit de Nadau, duas hemnas, la Catarina e l’Isabèu, que se n’èran anadas a la missa de mieja nueit, a Lectora. En aténder que tringuèssin a la glèisa de Sent-Gervasi, que caminavan sus la permenada deu bastion.
En tot caminar, que’s travèn los pès en ua branca.
– Catarina, ce ditz l’Isabèu, amassa donc aquera branca.
Mes la Catarina ne s’avó pas mei lèu amassat la branca que lo vent se l’emportè, dab l’Isabèu, suu planèr deu Bustet, on los posoèrs e tienèn sabat.
Las duas hemnas qu’arreconeishón aquí hèra de monde que n’aurén pas jamés creduts s’estar balhats au diable. E que n’an nomentat mantrun qui ne’n son pas estats briga contents ! Tot aqueth maishant monde que holassejava e que dançava en arron, en aténder que lo diable arribèssi sus ua carreta atalada per gats e limacs.
Puish que’s daubrí ua grana caisha plen-ha d’escuts e de loís d’aur. Mes, a mesura qui pagava, los escuts que’s cambiavan en carbons, e los loís d’aur en huelhas de sègas secas.
La paga hèita, lo diable que comencè la mala missa, en tot har lo signe de crotz en tèrra dab lo pè esquèr. Que lejó lo sent evangèli tot a l’envèrs. Au moment de la consecracion, que lhevè en l’aire ua ostia negra de tres puntas. E los crapauts e las aranas de cantar.

Après la consecracion, lo monde deu sa-bat que se n’anèn en coda-l’i-sèga, cadun dab la soa vergueta negra a la man, potoà’s lo diable devath la coda.
– Adara, au vòste torn, ce ditz ua vielha po-soèra a la Catarina e a l’Isabèu. I voletz anar ?
– Ò, que non, mon Diu !
Au nom de Diu, lo diable que hujó dab tot lo son maishant monde adarron d’eth.
Autanlèu, la Catarina e l’Isabèu que’s tornèn trobar portadas sus la permenada deu bastion, com tringava lo purmèr còp de la missa de mieja nueit.

Honts : Un conde deu Joan-Francés Blader que l’Enric Gougaud a tornat préner dens lo son libe en francés « Nadau : los mei beròis condes e hèitas de las provincias de França », a las edicions « L’archipel ».
Que me’u soi arrevirat au men torn en Occitan de las Lanas per Nadau de 2016, au cors d’ua passejada condada organizada per las Gavidairas-Devisairas de l’Ofici de Torisma de Baiona, dens los suberbaishs de las casamatas de la vila.
M. B.

Posted in

Laissez un commentaire

Vous devez être connectés afin de publier un commentaire.