Tiktok entà tu?

tiktok

De segur conéishes lo vielh Facebook e los sons 2,2 miliards d’abonats (38 milions de visitaires per mes en França), YouTube (46 milions de visitaires per mes en França) o enqüèra Twitter (13 milions de visitaires per mes en França).

Un estudi, de deceme de 2020 a genèr de 2021, qu’a ensenhat lo top 3 deus hialats* sociaus emplegats peus joens de 16 a 25 ans :

  1. Instagram (82%)
  2. Snapchat (74%)
  3. Facebook (54%) mès passa a 28% peus joens de 16-18 ans!

Los seguents que son Twitter (39%), Tiktok (38%), Pinterest (23%). Que vam oblidar Linkedin (22%) qu’ei sustot un hialat professionau.

L’estar* deus joens qu’ei Tiktok. Emplegat a 10% peus joens l’an passat, que son quasi 4 còps mes d’utilizators uei.

Tiktok qu’ei ua aplicacion mobila que’t permet de partatjar vidèos bracas (3 a 60 segondas) acompanhada d’un pauc de musica. Que pòts tanben ajustar filtres, efèits especiaus. E hèr deu hialatatge sociau.

Qu’ei l’enterpresa chinesa ByteDance que l’a desvolopada en 2017. Adara, qu’auré 185 milions d’utilizadors per jorn. 66% qu’an mens de 30 ans.

Tiktok dangerós ?

Nombrós especialistas que meten en guarda contra l’aplicacion Tiktok. Un tèst peu grop Anonymous (grop d’hacktivistas) qu’a muishat qu’amassan un gran nombre d’informacions personaus. Qu’estón condemnats a pagar ua esmanda de 5,7 milions de dolars après un escandale : qu’aven amassat informacions personaus de mainats de mens de 13 ans tà las véner a anonciaires (publicitat ciblada). Tot parièr, dus cercaires qu’an muishat que Tiktok pòt amassar las informacions Apple. Qu’ei a díser que s’emplegas lo ton Mac e qu’as l’apli Tiktok suu ton iPhone, l’apli chinesa que pòt legir tot çò qu’ei suu ton ordenador (messatges, mots de passa…). Tiktok qu’a anonciat que serà corregit dens la version que veng. Benlèu ua promessa de gascon…

Tomàs

Lexic:

estar : star

hialat – malhum : réseau

Posted in

Leave a Comment

You must be logged in to post a comment.