Perqué un tèrratrem au Marròc?

Dens la nueit deu 8 au 9 de seteme, un tèrratrem que truquèc la província d’Al-Haouz. En particular, Ouarzazate, Marrakech, Chichaoua, Azilal… estón tocadas. Lo tèrratrem qu’atenhoc 6,8 sus l’escala de Richter. Lo bilanç darrèr que compta 3 000 mòrts, mes de 5 600 nafrats, e milèrs d’abitacions arroeinadas.

Perqué un tèrratrem en aqueth endret?

En fèit, la region qu’ei sus ua halha sismica [que disem tanben ua copadura / faille] dens la placa africana. Que parlam de halha intraplaca. La region qu’ei hòrt expausada.

Mès se coneishem las regions riscadas, non sabem pas predíser los tèrratrems, sustot d’aquesta sòrta de copadura.

Que coneishem mélhor las halhas que bordejan las placas tectonicas. Per exemple, en California, la copadura de San Andreas (enter la placa pacifica e la nord-americana), que vesetz sus la fòto, qu’ei hòrt dangerosa. E que sabem qu’un tèrratrem se debana [a lieu, arrive] cada 150 ans. Lo mes important qu’estoc lo 18 d’abriu 1906 (magnitud 7,8; 3 000 mòrts). Mès non sabem pas predíser lo que va vénguer. E lo deu 6 de julhet de 2019, deu costat de Ridgecrest, un tèrratrem navèth de magnitud 7,1 que’s debanèc. N’i avoc pas de victimas.