Missa gascona

Guilhem

1. Confèssi a Diu tot poderós
e a vosauts, frairs,
qu’èi pecat tant e mei
en pensada e paraula,
per òbra e mancament.
Es de ma fauta, de ma grana fauta.
Aquí perqué supliqui
la Santa Verge Maria,
los ànjols e los sants,
e vosauts tanben, frairs,
de pregar per jo lo Senhor, noste Diu.

2. Senhor, pietat !
O Crist, pietat !
Senhor, pietat !

3. Glòria a Diu dens lo cèu
e sus la tèrra patz aus òmes :
Diu que’us aima.
Te laudam, te benedisem, t’adoram,
te glorificam e te regraciam
per ton immensa glòria.
Senhor Diu, rei deu cèu,
Diu lo Pair totpoderós.
Senhor, Hilh unic, Jèsus Crist,
Senhor Diu, Anhèth de Diu,
lo Hilh deu Pair.
Tu qui lhèvas lo pecat deu monde,
pietat per nosauts !
Tu qui lhèvas lo pecat deu monde,
agrada nosta pregària.
Tu qui ès assedut a la dreta deu Pair,
pietat per nosauts !
Tu sol ès lo sant,
tu sol ès lo Senhor,
tu sol ès lo Diu gran, Jèsus Crist,
dambe lo Sent Esperit :
dens la glòria de Diu lo Pair.

Amen.

4. Credi en un sol Diu,
Pair tot poderós,
creator deu cèu e de la tèrra,
de tot lo visible e l’invisible.
Credi en un sol Senhor, Jèsus Crist,
lo Hilh unic de Diu,
vadut deu Pair abans totes los sècles.
Diu, vadut de Diu,
lutz resplendor de la lutz,
Diu vertadèr vadut deu Diu vertadèr.
Engendrat e non creat,
substància unica dambe lo Pair ;
per eth tot qu’estó hèit.
Per nosauts, los òmes,
e per noste salut,
deu cèu devarè.
Per l’òbra deu Sent Esperit
s’incarnè de la Verge Maria
e òme se hasó.
Crucificat tanben per nosauts,
deu temps de Ponci Pilat,
patiscó e estó sepelit.
Ressuscitè lo jorn tresau
segon las Escrituras
e que montè au cèu ;
ei assedut a la dreta deu Pair.
Deu tornar dambe glòria
per jutjar los vius e los morts
e son regne serà sense fin.
Credi en l’Esperit Sant,
lo Senhor, lo qui dona la vita,
lo qui deu Pair e deu Hilh procedís.
Dambe lo Pair e lo Hilh
ei adorat parièr, e parièr glorificat ;
nos a parlat per los profètas.
E en la Glèisa :
una, santa, catolica e apostolica.
Confèssi un sol baptisme
per la remission deus pecats.
Espèri la resurreccion deus morts
e la vita deu monde qui vien.

Amen.

5. Sant lo Senhor,
Sant e mei que sant, lo Diu de l’univèrs !
Lo cèu e la tèrra son plens de ta glòria.
Hosanna dens lo cèu !
Benedit lo qui vien au nom deu Senhor !
Hosanna dens lo cèu !

6. Pair noste qui ès dens lo cèu,
que ton nom se sanctifique,
que ton regne nos avengue,
que ta volentat se hasque
sus la tèrra coma dens lo cèu.
Dona-nos uei noste pan de cada jorn,
perdona-nos nostes deutes
coma nosauts perdonam
aus nostes debitors
e hè que tombem pas dens la temptacion
mes desliura-nos deu mau.

7. Anhèth de Diu qui lhèvas lo pecat deu
monde, pietat per nosauts !
Anhèth de Diu qui lhèvas lo pecat deu
monde, dona-nos la patz !

 »Ave Maria »

Te saludi, Maria, plea de gràcia,
lo Senhor qu’ei dambe tu,
qu’ès benedida entre las hemnas
e benedit qu’ei lo frut deu ton vente, Jèsus.
Senta Maria, mair de Diu,
prèga per nosauts, pecadors,
ara e a l’ora de nosta mort. Amen.

Jacme Lacoma D’Estalencs