Los joens e la recèrca d’informacions

Anne Cordier qu’a escriut un libe: Grandir connectés. Les adolescents et la recherche d’information. Lo parat de cambiar las opinions.

Anne que coneish plan los joens e los adolescents, pr’amor que’us a frequentat purmèr com professor-documentalista dens lo son Centre de Documentacion e d’Informacion (CDI), puish sustot dens las soas recèrcas en sciéncias de l’informacion e de la comunicacion.

L’obratge que luta contra las boridas e arreboridas [lieux communs] de las generacions mei ancianas.

Per exemple, los adolescents ne’s senten pas tots expèrts o competents, com aqueth collegian: « Internet, n’aimi pas. Mes alavetz quan disi qu’aimi pas qu’ei briga. Que tròbi aquò nul. »

En fèit, los adolescents non son pas colhons, que saben l’espiar que’s pòrta sus eths e los discors sus las lors practicas. Per exemple, l’un d’eths que’s trufa de las afirmacions classicas com: « que saben tots piratar los sites ». Totun, aqueths discors non son pas shens efèit. Aquera liceana que ditz a la soa faiçon lo pes que’u se hè portar quan resumeish: « ne soi pas interessanta, qu’i coneishi arren ». O, mei trufandèr, aqueth licean que ditz: « quan parli que’s diré un vielh qui descobreish l’ordenador… »

L’ordenador qu’ei aquò?

Segon un estudi en 2021 deu mèdia soís RTS, 30% deus 9-16 ans n’utilizan pas jamei o quasi jamei d’ordenador entà anar sus Internet. Non saben pas aubrir un fichèr junt per exemple. En fèit, que’us estiman mei lo lor telefone [smartphone] o la lor tauleta.

Fin finala, las generacions navèras n’apareishen pas autan diferenta de las generacions adultas!