Los aparelhs de proteccion respiratòria (bis)
Guilhem
Los aparelhs de proteccion respiratòria
Introduccion
Aqueth expausat que’s vòu ua introduccion au domeni vaste de la securitat en particular los EPI e mei precisament los aparelhs de proteccion respiratòria. Que son numerós e diversificats dens l’industria quimica e farmaceutica ; que n’existeishen tipes diferents, que corresponen a domenis d’intervencion o a situacions de tribalh especificas. Lavetz la causida qu’ei dificila pr’amor ua utilizacion maishanta que pòt miar a consequéncias mei o mensh gravas.
Atau, l’objectiu men qu’es de’vs har compréner com son causits aqueths aparelhs, dab quins critèris e de’vs muishar los aparelhs diferents.
Causida de l’aparelh de proteccion respiratòria
L’emplec deus aparelhs que deveré estar limitat a las situacions excepcionaus (netejatge, cargament, evacuacion d’urgéncia, etc.) pr’amor de’us portar que hè puisheu e que rend lo tribalh mei penible. De mei, la proteccion portada per los aparelhs filtrants e los aparelhs isolants autonòmes, qu’ei limitada dens lo temps.
La causida d’un aparelh ne’s pòt pas har qu’après un estudi seriós de las condicions d’utilizacion, en particular que cau avalorar dab la precision mei bona :
la dòsi d’oxigèn dens l’aire (si ei inferiora o superiora a 17 %) ;
lo tipe de polluent (gas, aerosòu) ;
las caracteristicas toxicologicas deu polluent, subertot la valor limita d’exposicion (calculada sus 15 min.) o la valor mejana d’exposicion (calculada sus 8 ò.) admetuda suu lòc de tribalh ;
las condicions de tribalh : durada, accès a la zòna de tribalh, activitat fisica, etc. ;
l’usatge previst de l’aparelh.
Descripcion deus aparelhs diferents
La proteccion respiratòria qu’ei assegurada per duas familhas d’aparelhs :
los aparelhs filtrants : que purifican l’aire a l’entorn per filtracion ; ne deven pas jamei estar utilizats dens ua atmosfèra prauba en oxigèn ;
los aparelhs isolants : que son alimentats en aire respirable a partir d’ua sorda non contaminada ; atau, l’utilizator qu’ei independent de l’atmosfèra ambienta.
L’aparelh qu’ei generaument constituit de duas partidas : ua pèça faciau e, segon la familha de l’aparelh seleccionat, sia un dispositiu de filtracion, sia un dispositiu d’apòrt en aire respirable.
L’element en contacte dab lo visatge de l’operator qu’ei donc la pèça faciau. Que deu assegurar l’estanqueïtat entre l’atmosfèra ambienta e l’interior de l’aparelh. Atau l’utilizator que’u deu ajustar corrèctament pr’amor la preséncia de pèrtas que rend inoperanta tota proteccion respiratòria.
Un tèst simple e rapide entà verificar a cada utilizacion l’ajustament e l’estanqueïtat, entà s’assegurar de l’abséncia de pèrtas de polluents de cap tà l’interior de la pèça faciau : boçar las entradas d’aire dab la man ; si se pòt enqüèra respirar, la masca que perd e que deu estar ajustada mei plan o cambiada. La pèça faciau que pòt estar deu tipe :
mieja masca ;
masca completa ;
casco ;
cagola ;
ensemble capçau bucau.
Los aparelhs a epuracion d’aire
Los aparelhs filtrants que pòden estar a « ventilacion libra » si l’aire travèrsa lo filtre sonque dab los escambis respiratòris de l’utilizator o a « ventilacion assistida » si l’aire ambient ei aspirat capvath lo filtre mercés a ua pompa.
Que s’i torna trobar :
las pèças faciaus filtrantas ;
las mieja mascas o mascas completas dab 1 o 2 filtres ;
las mieja mascas o mascas completas a ventilacion assistida dab 1 o 2 filtres ;
los cascos, cagolas o combinasons a ventilacion assistida dab 1 o 2 filtres.
Las « pèças faciaus filtrantas » que son mieja mascas getaderas constituidas per lo materiau filtrant eth medish. Ne necessitan pas l’adjoncion d’un filtre. Que son marcadas dab FF.
Los filtres que son concebuts entà la proteccion contra polluents especifics. Qu’existeishen :
los filtres antiprova o antiaerosòu, definits en tres classas en foncion d’ua eficacitat creishenta. Los filtres de classa 1 (P1 o FFP1) contra los aerosòus shens toxicitat especifica, de classa 2 (P2 o FFP2) contra los aerosòus dangerós o irritants, e de classa 3 (P3 o FFP3) contra los aerosòus toxics. A mesura de l’utilizacion lor, chic a chic los filtres antiaerosòus que se boçan, opausant ua resisténcia creishenta au passatge de l’aire dab tostemps ua eficacitat intacta. Aqueth desalen que determina la durada d’utilizacion d’un filtre ;
los filtres antigas, definits per un còde color segon lo tipe de polluent que adsorbeishen, e puish en 3 classas segon la capacitat de captatge, de 1 la mei petita a 3 la mei grana. Lo « temps de clacatge » d’un filtre antigas que correspon a la durada d’utilizacion soa ; après, las susfàcias adsorbentas deu filtre que son saturadas e que dèishan passar tot lo gas polluent ;
Tipe_Color_Domeni d’utilizacion
A_marron_gas e vapors organics qui an un punt d’ebullicion superior a 65°C
B_gris_gas e vapors inorganics hòra lo monoxide de carbòni
E_jaune_dioxide de sofre e autes gas e vapors acides
K_verd_amoniac e derivat organic aminat
HgP3_roi e blanc_vapors de mercuri
NOP3_blu e blanc_oxides d’azòt
AX_marron_produits organics qui an lo punt d’ebullicion inferior a 65°C
SX_vriulet_compausats organics especifics designats per lo fabricant
los filtres combinant antiaerosòu e antigas.
Los aparelhs a aprovisionament d’aire
L’utilizator que pòt estar connectat a ua hont d’aire respirable per mèdi d’un canèth « aparelh non-autonòme » o portar la hont, d’aire o d’oxigèn, dab l’aparelh « aparelh autonòme ».
Los aparelhs a aire libre que son meilèu adaptats a tribalhs estatics dab risc de pollucion localizat mentre que los aparelhs a adduccion d’aire comprimit que son mei adaptats a tribalhs mobiles dab ua pollucion difusa o mau localizada autorn deu pòst de tribalh.
Los aparelhs autonòmes a aire comprimit que son dits a « circuit ubèrt » quan l’aire expirat ei regetat en l’atmosfèra.
Los aparelhs autonòmes a « circuit barrat » qu’eliminan lo dioxide de carbòni e la vapor d’aiga de l’aire expirat mercés a un dispositiu intèrne a l’aparelh e qu’enriqueishen l’aire de la quantitat d’oxigèn necessària entau cicle respiratòri seguent. Que son aparelhs a oxigèn comprimit qui compòrtan ua resèrva d’oxigèn o a generacion d’oxigèn on ua substància quimica que reageish dab la vapor expirada tà formar l’oxigèn necessari au cicle seguent.
Conclusion :
Per concludir, qu’auratz vist en aqueth expausat, dab quins critèris e son causits los aparelhs de proteccion respiratòria diferents tà que siin adaptats a las situacions de tribalh e tanben los aparelhs existents divèrs e lo regropament lor per familha e sosfamilha.
L’utilizacion d’aqueths aparelhs qu’ei necessari tà evitar tot risc d’alteracion de la santat per inalacion d’aire cargat en polluent quimic o apraubit en oxigèn. Tot mancament a la reglamentacion sus la causida de l’aparelh o sus l’utilizacion soa que hicaré l’utilizator davant consequéncias medicaus gravas ; qu’ei pr’amor d’aquò qu’ua atencion particulara qu’ei demandada e que deu estar l’ahar de tots, deu fabricant dinc aus utilizators.
Lo Rotland Castanhòs