Las potingas deu futur

deepmind.jpg

Leà

Uei, los laboratòris farmaceutics que crean los remèdis. Los uns que son avançadas de non pas créser, d’autes qu’an efèits segondaris hòrts o, au contrari, d’autes que son sonque placebos.

Benlèu, d’ara endavant, va caler comptar dab l’IA (Inteligéncia Artificiau) !

Ua prumèra experiéncia

En 2019, ua equipa australiana que conceboc un vaccin contra la gripa mercés a un algoritme. Tot prumèr, lo programa SAM qu’a analisat l’eficacitat de tots los vaccins contra la gripa. Puish, un dusau algoritme qu’a imaginat ua pièla* de compausats e causit los mes prometedís*. Nilolai Petrovsky, professor de medecina a l’universitat Flinders (Australia) qu’a aviat los tèsts. Qu’espèra ua eficacitat de 80% a 90% au lòc de 20% a 50% coma uei.

Coma l’IA trabalha mes viste que los umans, “que caloc mens de dus ans entà desvolopar aqueth vaccin navèth quan calèva cinc ans avant” ce digoc lo professor.

Lo problèma deus antibiotics

L’OCDE que pensa qu’en 2050, i aurà ua grana mortalitat devuda a la resisténcia deus còrs aus antibiotics. Mès los cercaires deu MIT e d’Harvard, ajudats per ua IA, qu’an descobèrt in silico (qu’ei a díser per modelizacion informatica) ua molecula mes poderosa que los antibiotics de uei. Aquera molecula que s’apèra halicin en omenatge a l’ordenador Hal deu film 2001, A Space Odyssey (2001, ua odissèa de l’espaci) de Stanley Kubrik.

Soritz* infectadas per A. baumannii, ua bacteria que resista a tots los antibiotics actuaus, qu’estón guaridas en 24 òras!

Deepmind e Google

Alphabet, la maison mair de Google, que veng de crear ua societat dita Isomorphic Labs (noveme de 2021). Qu’ei un laboratòri de recèrca farmaceutica, installat au Reiaume Unit. Lo cervèth que s’apèra DeepMind, ua IA. Que recrutan quimistas, biologistas, biofisicians e, de segur, especialistas d’IA.

Entà saber mes, va suu site de Isomorphic Labs (en anglés).

Leà

Vocabulari
ua pièla : un tas
prometedís : prometteur
soritz, murga : souris

Posted in

Leave a Comment

You must be logged in to post a comment.