La fica de dadas de securitat

Guilhem

La fica de dadas de securitat

Tà que serveish ua fica de dadas de securitat ?

Ua fica de dadas de securitat (FDS) qu’ei un document qui horneish, tà un produit balhat, un nombre important d’informacions concernent los dangèrs tà la santat e l’environament ligats a l’utilizacion deu produit, e indicacions sus los mejans de proteccion atau com sus las mesuras a préner en cas d’urgéncia.

Entà resumir qu’ei l’instrument utilizat tà comunicar las informacions de securitat deus produits quimics.

La FDS qu’ei regida per divèrs reglaments europèus, diferents reglaments e articles de REACH.
Lo son quadre generau qu’ei balhat per l’article R. 4411-73 deu còde deu tribalh.

Lo fabricant, l’importator o lo venedor d’ua substància o d’ua preparacion dangerosa que deu obligatòriament establir-ne ua FDS, redigida dens la léngua oficiau deus estats (qu’ei a díser que en França que deu estar redigida en francés) e transmetuda gratuitament au capdau d’establiment o au tribalhaire independent (qui deu eth medish comunicar-la au medecin deu tribalh), devath fòrma de papèr o autes supòrts.

Dab aquesta fica, lo capdau d’establiment que deu :
analisar e estimar los risques dens los quaus son expausats los salariats ;
informar los salariats concernits e formar-los a ua utilizacion corrècta e segura deu produit ;
elaborar ua notícia per cada pòst de tribalh on un salariat ei miat a utilizar produits quimics dangerós tà los quaus la FDS ei utila.

La fica de dadas de securitat (FDS) que deu estar datada e hornida gratuitament :
a la purmèra liurason ;
après tota revision significativa de las soas proprietats o de las precaucions a préner, a tots los utilizators avent recebuts lo produit dens los 12 mes qui precedeishen la revision d’aquesta fica.

Quinas son las entresenhas qui podetz trobar sus aquestas ficas ?

Ua FDS que contien setze rubricas.
Qu’ei estandardizada e que possedeish un format fixe, qu’ei de bon utilizar pr’amor las informacions que’s trobaràn tostemps au medish endret sus la fica :
identificacion deu produit e de la societat responsabla de la soa mesa suu mercat ;
las informacions suus compausants ;
l’identificacion deus dangèrs ;
la descripcion deus purmèrs secors a portar en cas d’urgéncia ;
las mesuras de luta contra lo huec ;
las mesuras a préner en cas de dispersion accidentau ;
las precaucions de manipulacion e d’estocatge ;
lo contròle de l’exposicion deus tribalhadors e las proteccions individuaus adaptats ;
las proprietats fisicas e quimicas ;
l’estabilitat deu produit e la sa reactivitat ;
las informacions toxicologicas ;
las informacions ecologicas ;
las informacions sus las possibilitats d’eliminacion de las dèishas ;
las informacions relativas aus transpòrts ;
las informacions reglamentàrias ;
autas informacions disponiblas.

Tà concludir que rapèri que la FDS serveish de mejan de comunicacion tà las informacions de securitat deus produits quimics, qu’ei sosmesa a ua reglamentacion plan precisa com l’avem vist amassa e que deu hèit de la soa estandardizacion las informacions que’s tròban tostemps au medish endret.