Guida de subervita en çò deus zòmbis

Leà

Nadau arriba, lo parat de causir quauques presents originaus. E, a còps, quauques tesaurs se pòden trobar dens ua libreria. Per exemple:

Aqueth libe vos pòt sauvar la vita

Ei çò qu’anoncia l’autor american, Max Brook, hilh deu realizator Mel Brooks e de la realizatora  Anne Bancroft.

Lo libe conteng totas las claus entà subervíver a las atacas de morts-vius que s’aprèssan de vosautes en aqueth quite moment. Vos perpausa exemples precís e astúcias reconegudas per expèrts de reputacion internacionau. E vos balha la conduita a ténguer en totas circonstàncias entà vos tirar d’ahar.

Lo libe avoc ua beròja escaduda a la sua sortida (2003 aus Estats Units, 272 paginas). Estoc editat tanben en format “pòcha”. Existish en anglés e en francés (Guide de survie en territoire zombie). E se pòt trobar tanben en linha (pdf).

Tad aver ua idèa, ací avetz la debuta de l’abans-díser:

Los morts caminan au miei de nosautes. Zòmbis, vampires, aquò rai lo nom, aqueths somnambules son la miaça mei grana entà l’umanitat, péger que l’umanitat era medisha. Los aperar predators e nosautes presas* seré inexacte? Son ua calamitat, e la raça umana lo lor òste*. Las victimas astrugas* son devoradas, los òs rasclats, la carn consumida. Los qu’an pas autant astre rejunhen los rengs deus lors atacants, transformats en mostres putrides e carnivòrs. La guèrra convencionau ei inutila contra aqueras creaturas, tot com la pensada convencionau. La sciéncia entà méter fin a la vita, desvolopada e perfeccionada despuish lo començament de la nosta existéncia, non nos pòt pas protegir d’un enemic qu’a pas “vita” a acabar. Açò significa que los morts vius son invencibles? Non. Aqueras creaturas e pòden estar arrestadas? Quiò. L’ignorància ei l’aliat mei hòrt deus morts-vius, la coneishença deu lor enemic mei murtrèr*. Ei pr’amor d’aquò qu’aqueth libe estoc escrivut: entà las coneishenças necessàrias a la subervita contra aqueths bèstias sosumanas*.

astre: chance
astruc, fortunat: chanceux
murtrèr: meurtrier
presa: proie
òste: hôte
sosumana: sos umana (sous-humaine)