Contra lo coronavirús… e las soas consequéncias !

posoer

Guilhem

Uei, crisi mondiau obliga, que’m soi clinat suu problèma grèu e inedit qui’s pausa a nosauts. Çò qu’es aquera plaga, o aquera calamitat, qui n’am pas james coneishuda dens lo nòste praube univèrs.
Lavetz, qu’èi consultat lo beròi monde deus especialistas mondiaus, posoèras e posoèrs, broishas e broishs, hatilhèras e hatilhèrs, magas e magues, endevinairas e endevinaires, qu’èi convocat tot lo ban e l’arrèrban qui’s podèva trobar, non solament dens tota la Gasconha e dens lo Bearn vesin, mes dens los parçans mei luenhècs, com los vielhs druidas de Bretanha, los ajòus deu Panoramix, los « Barons Dishabte » de las Antilhas, o tanben los vielhs savis chinés… Normau, ce’m diseratz, quan sabem adara qu’aqueth fotut virus e vien de China! Que serí anat medish véder, s’avè calut, quauques sabentàs deu planèta Mars, se n’avè pas costat tròp car a Radio Cap a Cap!…
Per har brac, qu’èi remudat cèu e tèrra… e n’èi pas trobat nada solucion! Que m’entenetz: « Nada solucion! ». Ne i a pas arren a har, sonque aténer en damorar confinats, en esperant que ne devieneram pas completament « confits », pr’amor, se i a ua navèra gripa aviari qui arriba per dessús aquò, que seram bons tà estar getats a las lordèras…
Lavetz, çò que cau har? Damorar los braç crotzats, aténder que la mòrt, aquera caronhassa, e vienossi nos préner çò qui’ns damòra d’alen? Que non pas! Profieitar deu bèth temps tornat e de la prima qui es aquí, shens tròp s’esluenhar de casa totun. Tornar trobar lo plaser de’s har lo casau, quan an l’escadénça de n’aver un. Aténder shens pèrder paciéncia en minjar las purmèras ahragas, los purmèrs rafolets, o los purmèrs espargues. Legir, pensar e saunejar a jorns melhors. Pr’amor, la vita qu’es tròp braca! E ne’vs desbrombitz pas deu vielh arreproèr, car au Jan de la Hont: « Paciéncia e longor de temps, que hèn mei que fòrça ni qu’arrauja! »
Adonc, se la mia croniqueta ne’vs hè pas ben, ne’vs poirà pas har mau tanpauc!… Qu’es tot lo mau qui’vs desiri!

Lo Miquèu Baris

Posted in

Laissez un commentaire

Vous devez être connectés afin de publier un commentaire.