« Annus horribilis ! », lo conde de Nadau de 2020

Nadau.webp

Guilhem

Un conte de Nadau que parla de pandemia. Interessant, non?

Atcha! Decididament, tau Pair Nadau, enguan, qu’es lo somiu! Annus horribilis! com disè lo bon sent Nicolau, lo son ajòu. Un desastre! Stop and go! La tèrra sancèra – n’ac am pas james vist – que pateish de la mei grana pandemia coneishuda dempuish la pèsta negra deu sègle XIVau. Tà’s parar, que ns’en barran, que’ns desembarran dens tots los con·hins deu planeta blu. Ingeribla, aquera economia en acordeon, tan per los ahars personaus com ta’us deus òmis. Que cau andar! Perpausar, en aqueths temps tan hitjuts, un present de profieit qui convieneré a tots. Conscient deus excès d’abans, qu’es resolut pr’amor, au hons, qu’es ua bona leçon. Davantejant los reis magues portant diadèma, aqueth virus tanben coronat, a despieit deus domaus que n’es responsable, que suggereish benlèu aus òmis un chic mei de saviesa…
Pas mei nat gaspilhatge, tornar a la natura! A cada contrada, lo son materiau! Costat joguets, adonc, bon pin de las Lanas o casse d’Ador. A la rigor, avet de las Vosges… Tostemps vestit de la soa garnaisha en pura lan verge hornida preus motons de Marquesa, que i a bèras luas que balha l’exemple, eth. Mes en-guan, qu’es un aut par de mitanas! Tan lèu lo solstici d’estiu, qu’a saunejat au « IT » present d’aqueth millesime especiau d’auherir au monde endolorit per tan de patiròla e de chepics, en aqueths temps d’esperança. Que s’es tostemps emparat, tà’s manifestar, sus la data de la Vaduda, lo « Naël » deus ancians, qu’es lo moment o james de balhar presents en acòrd dab lo vertadèr esperit de la Nativitat, la magia simbolizada preus reis deu Lhevant qui’s pòrtan las soas aufrendas simbolicas.

Atenut pertot, medish au mei pregond deus parçans subtropicaus on esbarreja un chic de gai aus dròlles que la pèth e’s declina en ua paleta de colors ambradas, deu bòsc d’arròsa a l’ebèn, lo Pair Nadau que’s hica donc a l’obratge tad aquera virada hèra especiau. Devath lo vielh bedoth qui guarda l’entrada deu talhèr n° 1, devath las latituds boreaus, que s’elabòra lo plan.

Purmèr, que cau testar tots los hadets de faiçon a non pas espandir, au miei de las poscas d’estelas, la particula malefica de Wuhan.

Après, verificar qu’augin plan compres los gèstes barralhas pr’amor, medish en altitud, un esternuguèt angelic, per la fòrça de la gravitat, que poderé transmuda’s en fatau brumizacion. Enfin, liurar au mei viste çò qui a secretament torrinat, de non sabut de tots.
L’estat deu monde que’u desconsola. Aqueths comedians e cantaires obligats de damorar muts… Aqueths esportius shens public… Aqueths restaurators qui ploran davant las cosinèras… E aqueras praubas vacas landesas deu Gavardan o de Buglòsa privadas d’arènas… Acabat, lo saut de l’ànjol e los escarts perilhós! Lo bueu deu presep que se’n sòrt miélher… Que se’n va de l’aviéner de l’umanitat, dens tots los sens deu mòt… Lo corrièr deus adultes que’u hen lo còr: « Pair Nadau, lo men patron qu’a devut hicà’m au caumatge parciau… ». « Hèra car Paponet Nadau, dab los mens endarrerats, los mens remborsaments e las mias cargas, n’èi pas mei qu’ua opcion, la clau devath l’eishugapès ». Lo brave òmi que n’es tot arrevirat, mes que se n’arrid dens la soa barba a l’idea de la bona suspresa tad aqueths grans dròlles.
Malaja! Que va caler har dab lo cobra-huec! Pas simple, quan trabalhan, dempuish las tenèbras deu temps, la nueit de la Nativitat! Mes, tà la França, ne’s hè pas briga de chepic. L’Amaniu ne’s pòrta pas fin finau lo medish nom que lo qui hestejam en aqueth temps de solstici? Com ne seré pas comprenedor? De hèit, un corric enviat a l’Elisèu que s’arreceb hèra viste ua responsa… positiu: No problem! Of course! Qu’èra ua causa entenuda! Tà non pas estar en rèsta, Father Christmas que’s dobta que los auts grans d’aqueth monde que van seguir. Deu Mont a Vladivostòc e de Chicoutimi ad Antofagasta, que va caler har lo trabalh, lo jòb. E tau miélher, qu’ac vatz véder!

Qu’es partit! Emparat, com los sons rèns e los sons hadets, per caretas en peu d’ors polar, a l’encòp identitàrias mes tanben emparaders deu hred e deus miasmas morbides, lo Gran Distribuidor que’s hica en camins.

Susvolant las bartas d’Ador anegadas, on lo rebat de la lua clapoteja estranjament, e las crastas de la Gran Lana transmudadas en arrius impetuós, a maugrat de las soas clucas embrumadas e mercés au son Gavidaire Personau deu Sendèr, que s’i arretròba.
Se l’an passat, pressat per la mission qui es la soa, avè cutat anegà’s entre Pishamonge e las lagüas deu Gat Mòrt, pr’aqueth an de gràcia de 2020, que’n va au balanç.
Après aver verificat las comandas, lo vielh Bonòmi que hierarquiza lo « temps » de la distribucion. Los amics de la soa classa deus EHPAD, purmèr. Puish lo personau espitalèr tan present, tan generós. E enfin, tot lo monde, grans e petits, savis e mens savis. L’equipa de Sud-Ouest tanben: que cau plan difusir la novèla! E aquera Bona Novèla, qu’es plan lo preciós cargament qui desborda de la soa cimarra: envolopats hens mirificas palhetas argentadas, chocolats per milèrs, tuaires de virus. Meravilhós presents tau monde en·hangat dens la desesperança. Solide, entaus mei petits, que i a tostemps dens lo tistèth o la mièra, l’estòc de joguets « de casa hèits », com disen a nòste. Mes en aqueste Nadau, qu’es la bonicaria suenhosament concebuda preu Patriarca qui, abans de cambiar de via, avè, adès, que i a hèra de temps d’aquò, seguit cors de bioquimia moleculara a l’Universitat de las Auròras Boreaus, qui representa un present reiau aus princis de la Tèrra com aus mei desamonedats. Conservats a – 70° dempuish mes, acerà, près deu pòle, los estòcs que son guarantits. Hidable, aqueth remedi divinau anidat au cor d’ua deliciosa bonicaria que sauvarà l’umanitat. Lo Diable, o Cohet, qu’aurà perdut!

Honts: Aqueth conde qu’es estat escrivut per la Benedicta e lo Jan-Jacme Fénié, de Pissòs, preu compte deu Jornau Sud-Oèst, per Nadau de 2020. Que me’u soi arrevirat per la circonstància. Que siin mercejats pr’aqueth apòrt!
M. B.

Posted in

Laissez un commentaire

Vous devez être connectés afin de publier un commentaire.